Premierement que le Roy accorderoit une amnistie generale à tous les Cosaques et paysans rebelles, et que tout ce qui s'estoit passé demeureroit pour non avenu.

2- Que Kmielniski leur General demanderoit pardon à sa Maiesté à genoux et Prosterné.

3- Qu'il seroit continué General desdits Cosaques dont le nombre seroit augmanté iusques à quarante-mil, en laquelle qualité il ne dependroit que du Roy, apres qu'il auroit pourtant fait un acte de reconnoissance come Gentilhomme Polonnois, à l'esgard de la Republique.

4- Que sa Maiesté Polonnoise auroit un rolle des noms et Demeures desdits quarante mille Cosaques, lesquels en cas que Kmielniski vinst à mourir, seroient commandés par un de leurs Chefs de la Religion Grecque.

5- Que l'armée assiegée a Zbaras, seroit mise en liberté.

6- Que la Religion Grecque pourroit estre exercée par tout le Royaume, mesme à Cracovie, & que son union avec l'Eglise Romaine cesseroit.

7- Que le Palatinat de Kiovie seroit tojours donné à un Seigneur Grec.

8- Que le Metropolitain des Grecs auroit seance dans le Senat parmy les Evesques et y occuperoit le neufviesme lieu.

9- Que les Cosaques auroient permission de faire de l'eau de vie pour leur usage et non pour en vendre.

10- Qu'on leur fournirait des draps pour les vestir, et à chacuyn dix florins pour s'armer.

11- Que les Nobles estans rentrez dans leurs domaines ne pourroient rechercher ny troubler leurs sujets, pour la reparation des dommages qu'ils en pourroient avoir soufferts.